रंत रैबार ब्यूरो दिल्ली।
उत्तराखण्ड का बरिष्ठ समाजसेवी, रंगकर्मी स्वर्गीय दयालधार तिवारी जी की जयंती ‘समलौण’ वोंका गौं गाँव बहेड़ा, पट्टी बामुंड, विकासखंड चंबा, जिला टिहरी गढ़वाल स्थित राजकीय प्राथमिक विद्यालय म आयोजित करेगे । दयालधार तिवारी जी की बेटी सुप्रसिद्ध लोकगायिका मनोरमा तिवारी भट्ट ला बोलि कि बहेड़ा मेरा पिता जी की जन्मभूमि च यख पिताजी की याद म आयोजन करणु मेखुणी एक भावुक व गौरवपूर्ण क्षण चा। दिल्ली म ता हम लोग लगातार अपरा पिताजी तैं आयोजन का माध्यम से याद करदा ही छौ। पण पहाड़ म यना आयोजन हूण चंदन ताकि यख भी नै पीढ़ी तैं अपरा लोगों का बारम जानकारी हो।
स्वर्गीय दयालधर तिवारी जी कु उत्तराखण्ड राज्य आन्दोलन म सक्रिय सहयोग रै। समाज का हर तपका तैं आपन आजीवन सहयोग दे। दिल्ली म गढ़वाल की एकमात्र सबसे पुरणि संस्था गढ़वाल हितैषिणी सभा का आप सक्रिय आजीवन सदस्य छाया। संस्कृति व भाषा का विकास व उत्थान म आपकु योगदान सराहनीय छौ। गढ़वाली भाषा तैं संविधानै आठवीं अनुसूची म शामिल कना खातिर आप उत्तराखण्ड लोक-भाषा साहित्य मंच दिल्ली व उत्तराखण्ड लोक मंच का काम से बरौबर जुड्यां रैन। नौछमी नारैण गीत म आपकु अभिनय भौत सराहनीय रै। कुल मिलैकि स्वर्गीय दयालधर तिवारी जी बहुमुखी प्रतिभा का धनी व्यक्ति छाया।
ये आयोजन म सुप्रसिद्ध समाजसेवी, माता पार्वती देवी चैरिटेबल ट्रस्ट क अध्यक्ष श्री महावीर सिंह राणा जी* मुख्य अतिथि क रूप म उपस्थित छाया । श्री राणा ला तिवारी जी का व्यक्तित्व व कृतित्व परैं अपणा विचार रखीं। यां का अलावा गढ़वाल हितैषिणी सभा की वर्तमान कार्यकारिणी व सुप्रसिद्ध समाजसेवी श्री देवेंद्र जोशी जी, श्री विनोद नौटियाल जी एवं श्री गोविंद राम भट्ट आदि लोगों की गरिमामयी उपस्थिति ला कार्यक्रम तैं हौरि गरिमा प्रदान कैरी ।
राजकीय प्राथमिक विद्यालय की प्रधानाचार्या आदरणीय मंजू गैरोला व राजकीय हाई स्कूल क प्रधानाचार्य श्री धन सिंह चौहान व समस्त सहयोगी शिक्षकगण जौंका आपके सहयोग व समर्पण से ही यु आयोजन सफल ह्वे। गौं का लोगों ला बि ये आयोजन म बढ़चढ़कै भाग ले। खास कार्यक्रम का सबसे सुंदर व अद्भुत हिस्सा छ्वटा बच्चों की भागीदारी व वोंकी प्रस्तुति रैन । बच्चों ला भौत लगन अर उत्साह से अपनी प्रस्तुतियाँ देन। इतगा कम समय म यनि बढ़िया प्रस्तुति कैकी बि कल्पना से बढिकी छै । दगड़ी तिवारी परिवार का लोगों का सहयोग से यु आयोजन सफल ह्वे। कार्यक्रम म प्रस्तुति देण वळा बच्चों तैं पुरुस्कार स्वरुप स्मृति चिन्ह, प्रशस्ति पत्र आदि से सम्मानित करेगे।
अंत म श्रीमती मनोरमा तिवारी भट्ट ला सभी उपस्थित लोगों कु आभार व्यक्त कैरी।
About the Author
