रंत-रैबार ब्यूरो…….
नई दिल्ली : दिल्ली प्रदेश अध्यक्ष हर्ष मल्होत्रा द्वारा दिल्ली प्रदेश भाजपा का सचिव डॉ विनोद बछेती तै दिल्ली प्रदेश म उपाध्यक्ष बणये गेन। यां से पैलि बछेती जी मयूर विहार जिल्ला भाजपा का अध्यक्ष व दिल्ली प्रदेश का सचिव बि रै चुकि गेन।
दिल्ली म एक सफल उद्यमी, समाजसेवी, भाषा प्रेमी डॉ बछेती उत्तराखण्ड समाज का प्रतिष्ठित व्यक्ति छन। खासकर भाषा, साहित्य व संस्कृति के प्रति बछेती जी कु समर्पण अद्वितीय च।
वर्ष 2012 बिटिन उत्तराखण्ड लोक-भाषा साहित्य मंच दिल्ली का तत्वावधान म व दिल्ली पैरा मेडिकल एन्ड मैनेजमेंट इंस्टिट्यूट का सहयोग से लगातार भाषा शिक्षण कक्षाओं कु संचालन हो चा महाकवि कन्हैयालाल डंडरियाल साहित्य सम्मान हो या सामाजिक सरोकारों कु क्वी बि काम हो डॉ बछेती कु सहयोग हमेशा रैंद। दिल्ली
म गढ़वळि, कुमाउनी, जौनसारी अकादमी का गठन म बि डॉ विनोद बछेती कु योगदान अग्रणी च।
दिल्ली एनसीआर म उत्तराखण्ड का लाखों लोग निवास करदन। दिल्ली म ही
लगभग पच्चीस लाख से बंड्या लोग उत्तराखण्ड का रंदान लेकिन राजनैतिक भागीदारी ना का बरोबर च। द्वी-चार निगम पार्षद व द्वी विधायक का अलावा दिल्ली म उत्तराखण्ड समाज कु क्वी विशेष
प्रतिनिधित्व नी। डॉ बछेती लगातार संघ व बीजेपी से जुड्यां छन। लोगों तैं उम्मीद च कि अगनै बछेती जी तैं हौरि बड़ी जिम्मेदारी मिलली।
उत्तराखण्ड लोक-भाषा साहित्य मंच दिल्ली का संयोजक साहित्यकार दिनेश ध्यानी ल बोलि कि डॉ विनोद बछेती जना मनीषी राजनीति म आला ता वोंका द्वारा समाज के खातिर जरूर भला काम होला। विशेषकर भाषा, साहित्य का क्षेत्र म हम तैं उम्मीद च कि अगनै बढ़िया काम होला।
अचकाल बछेती जी तैं कै सामाजिक संगठन व लोग सम्मानित करणा छन। यीं कड़ी म डीपीएमआई सभागार म दिल्ली एनसीआर का तमाम संगठनों व साहित्यकारों द्वारा डॉ बछेती कु सम्मान करेगे। सबुतैं उम्मीद कि डॉ बछेती हमरा समाज का अग्रणी मनीषी छन, यों का नेतृत्व म हमरी भाषा, साहित्य को विकास होलु यनि उम्मीद छन।
About the Author
