स्व.शिवदर्शन सिंह नेगी जी कि जयन्ती का उपलक्ष्य मा आयोजित ह्वे ‘ शिवदर्शन सिंह नेगी स्मृति आखर विज्ञान शिक्षक सम्मान
सम्मानित शिक्षिका तैं अंगवस्त्र,मान पत्र, विशेष आखर स्मृति चिह्न अर पाँच हजार एक सौ (5100/-) रुप्या कि नकद धनराशि भेंट कर्ये ग्ये।दगड़ा मा सम्मानित शिक्षिका गीता चौहान जी का वे छात्र निर्मल पंवार तैं बि पैला ‘शिवदर्शन सिंह नेगी स्मृति आखर विज्ञान छात्र सम्मान’ से सम्मानित कर्ये ग्ये जो राष्ट्रीय स्तर पर बंगलौर मा आयोजित विज्ञान संगोष्ठी-वर्ष 2025 का वास्ता चयनित ह्वे अर राष्ट्रीय स्तर परैं दूसरो स्थान पै।
कार्यक्रमै सुरुवात मंचासीनअतिथियोंन द्यू बाळिक, स्व. शिवदर्शन सिंह नेगी जी कि फोटो परैं माल्यार्पण,वूं तैं फूल-पाति चढ़ैकि करि अर फिर शिक्षिका राधा मैंदोली जीन सरस्वती वंदना कि प्रस्तुति दे।
यो कार्यक्रम अर सम्मान समारोह मुख्य अथिति हे. न.ब.गढ़वाल केंद्रीय विश्वविद्यालय, सीरिनगरा वरिष्ठ सहायक प्रोफेसर ( भौतिक विभाग) अर पर्यावरण विशेषज्ञ डॉ. आलोक सागर गौतम जी,कार्यक्रम अध्यक्षत प्रोफेसर सम्पूर्ण सिंह रावत जी,विशिष्ट अतिथि अज़ीम प्रेमजी फाउंडेशन सिरीनगरा प्रभारी डॉ. प्रदीप अंथवाल जी, मुख्य वक्ता अर शिक्षक श्री कमलेश चन्द्र जोशी जी,श्रीमती लक्ष्मी रावत(मुख्य ट्रस्टी -आखर ट्रस्ट ) जी, कु.श्वेता पंवार, रीजनल रिपोर्टर की संपादक श्रीमती गंगा असनोड़ा थपलियाल जी, अवकाश प्राप्त शिक्षिका अर सुप्रसिद्ध साहित्यकार श्रीमती उमा घिल्डियाल जी, अवकाश प्राप्त प्रधानाचार्य श्री अवधेश मणि लाल जी, शोधार्थी राकेश जिर्वाण हंस,श्रीमती अंजना घिल्डियाल जी,श्री भूपेंद्र सिंह नेगी जी , श्री नन्द किशोर नैथानी जी , कवयित्री एवं शिक्षिका श्रीमती राधा मैंदोली जी, शिक्षक डॉ.हर्षमणि पाण्डेय जी, अवकाश प्राप्त शिक्षिका श्रीमती बीना मेहरा जी, श्रीमती संगीता पंवार जी , कु. प्रिया पंवार, शुभम, श्री चंद्रशेखर मेवाड़ जी,अज़ीम प्रेमजी फाउंडेशन का किरन अर चरण सिंह दगड़ा हौरि शिक्षकों की गरिमामयी उपस्थिति मा ह्वे।
कार्यक्रम अध्यक्ष प्रोफेसर सम्पूर्ण सिंह रावत जीन आखर ट्रस्ट कि यीं पहल कि बढ़ै करि अर बोलि – ‘स्व.नेगी जीन शिक्षा का क्षेत्र,छात्र हित अर समाज मा सदानि मार्गदर्शक कि भूमिका निभै । स्व.शिवदर्शन सिंह नेगी जी शिक्षा तैं समर्पित एक नवोन्वेषी शिक्षक छा। आज का समौ मा स्व. शिव दर्शन सिंह नेगी जी जना व्यक्तित्व से प्रेरणा लेण जरूरत छ।’
मुख्य अथिति डॉ.आलोक गौतम सागर जीन बोलि कि – स्व. नेगी जी जौंन समाज अर शिक्षा जगत मा
अपणो अमूल्य योगदान दे वूं तैं याद कन्न भौत जरूरी छ अर वूं का काम तैं अगनै बढाणै जरूरत छ।’ दगड़ा-दगड़ी वूंन अगासै बिजली अर मौसम, हव्वा-पाणि कि गुणवत्ता,श्रीनगर क्षेत्र मा वायु प्रदूषणन स्वास्थ्य परैं प्वड़ण वळा प्रभावों कि बात बि करि।
कार्यक्रमौ संचालन शिक्षक भूपेन्द्र सिंह नेगी जीन करि अर दगड़ा-दगड़ी स्व. शिवदर्शन सिंह नेगी जी का व्यक्तित्व, कृतित्व, वूं का द्वारा शिक्षा जगत अर समाज मा दिये जाण वळा योगदान तैं सब्यूं सामणि रखिक तैं बोलि कि – ‘ स्व. नेगी जी भौत जुझारु , प्रयोगधर्मी, प्रतिभा सम्पन्न, जागरूक शिक्षक होणा दगड़ा एक कवि हृदय अर समाज सेवी बि छा।’
प्रखर वक्ता अर रा.इ.कॉलेज कीर्तिनगर का रसायन विज्ञान प्रवक्ता श्री कमलेश चंद्र जोशी जीन बोलि कि -‘स्व. शिवदर्शन सिंह नेगी जी एक आदर्श शिक्षक छा अर सब्बि शिक्षकों वास्ता अर समाजा वास्ता प्रेरणास्रोत छन। वूंन आर्टिफीसियल इंटेलीजेंस परैं अपणो वक्तव्य रखि।कार्यक्रमै आखिर मा आखर ट्रस्ट का अध्यक्ष संदीप रावतन कार्यक्रम मा अयां सब्बि मैमानों आभार व्यक्त करि।
About the Author
