रंतरैबार व्यूरो दिल्ली।
नई दिल्ली। उत्तराखण्ड का सुप्रसिद्ध लोकगायक, गीतकार, नाटककार स्वर्गीय जीत सिंह नेगी जयंती समारोह का अंतर्गत दुसरु आयोजन मार्च 2026 म मयूर पब्लिक स्कूल दिल्ली म होलु। ये साल को पैलु आयोजन 1 फरबरी, 2026 खुणि डीपीएमआई सभागार, न्यू अशोक नगर म ह्वे छौ। उत्तराखण्ड लोक भाषा साहित्य मंच, दिल्ली लगातार स्वर्गीय जीत सिंह नेगी जी का लोक विधाओं गीत, नाटक आदि परैं आयोजन करणु चा। मंच का संयोजक दिनेश ध्यानी ल बोलि कि हमरि कोशिश च कि पूरा साल नेगी जी का लोक परैं आयोजन होवन। स्वर्गीय जीत सिंह नेगी हमरा पहाड़ा लोक गीत, संगीत का वट वृक्ष छन। नेगी जी ला आजीवन हमारा लोक का खातिर अपरु जीवन समर्पित कैरि ता हम लोगों कु फ़र्ज़ च की हम लोग नेगी जी का गीत, संगीत व ओंका समर्पण तैं समाज का समणी रखां। श्री ध्यानी ल बोलि कि ये बाबत हमुन कै संगठनों व उत्तराखण्ड सरकार से बात कैरी पर कैल बि हुंगरा नि देन। ज्वा कि भौत विचारणीय बात च। हम अपरा इतिहास पुरुषों तैं याद किलै नि करदा ? ये परैं गम्भीरता से विचार हूण चैन्द। मयूर पब्लिक स्कूल म विस्तार से नेगी जी का गीत, संगीत व नाटकों परैं चर्चा होली। ये मौका परैं स्वयं मनवर सिंह रावत जी अपरा भजन व नेगी जी का गीतों का माध्यम से व सुप्रसिद्ध लोक गायक सर्वेश्वर बिष्ट समेत कै गायक स्वर्गीय जीत सिंह नेगी जी का गीतों का माध्यम से नेगी जी तैं याद कारला।
सुप्रसिद्ध समाजसेवी, मयूर पब्लिक स्कूक का चेयरमैन, गढ़वाली, कुमाउनी, जौनसारी अकादमी का पूर्व अध्यक्ष मनवर सिंह रावत स्वयं एक भाषा-संस्कृति प्रेमी मनखी छन। रावत जी ल बोलि कि हमरु सौभाग्य च कि हम स्वर्गीय जीत सिंह नेगी जी का लोक संसार परैं चर्चा कना छौ। स्वर्गीय जीत सिंह नेगी जी हमारा समाज व नै पीढ़ी का वास्ता प्रेरणाश्रोत छन। हम लोगों तैं अपणी भाषा, संस्कृति व सामाजिक सरोकारों का खातिर जरूर सहयोग कन चैंद। उत्तराखण्ड लोक भाषा साहित्य मंच, दिल्ली का माध्यम से दिनेश ध्यानी जी व वोंकी पूरी टीम लगातार काम करणी च। गढ़वाली, कुमाउनी भाषाओं तैं संविधानै आठवीं अनुसूची म शामिल कना खातिर मंच लगातार प्रयास करणु चा।
उत्तराखण्ड लोक भाषा साहित्य मंच, दिल्ली द्वारा स्वर्गीय जीत सिंह नेगी जी की शताब्दी समारोह कु आयोजन करणु अपणा आप म अनुकरणीय काम च। हमरा सामाजिक, सांस्कृतिक संगठनो तैं व उत्तराखण्ड सरकार तैं ये बाबत आयोजन कन चैन्द। स्वर्गीय जीत सिंह नेगी जी हमरा समाज का पैला लोक गायक व गीतकार छन। इलै यना मनीषियों परैं बड़ा आयोजन हूण चंदन।
About the Author
