हितैषिणी सभा ल धूमधाम से मनै इगास महोत्सव…..

रंत रैबार ब्यूरो दिल्ली…

नई दिल्ली। १ नवंबर. २०२५ खुणि दिल्ली गढ़वाल भवन म दिल्ली की सौब से पुराणी संस्था गढ़वाल हितैषिणी सभा द्वारा इगास महोत्सव कु आयोजन करेगे छौ। ये आयोजन म समाज का प्रबुद्ध लोगों ल शिरकत कैरी। ब्याखुनि ४ बजी बिटिन आयोजित ये आयोजन म दिल्ली विश्वविद्यायल का छात्र-छात्राओं द्वारा सांस्कृतिक कार्यक्रम प्रस्तुत करीं। का दगड़ी सब्यों ल भैलू खेलि कि पौराणिक परम्पराओं तैं सजीव कैरि दे। भैलु, दीप प्रज्जवलन व अलावा पहाड़ी भोजन से मैमानों स्वागत करेगे।
बुले जांद कि जब भगवान् रामचंद्र जी लंका विजय का बाद माता सीता व लक्ष्मण समेत अयोध्या पौन्छिन ता लोगों ला दीप जलैकि दीपावली मनैकि वूं कु स्वागत कैरी। बुल्दन गढ़वाल म य खबर ग्यारा दिन बाद पौंछि तब यखा लोगों ला ग्यारा दिन बाद दीपावली मनै। एक हौरि लोक परम्परा का अनुसार बल ४०० साल पैलि राजा महीपत शाह का जमन म तिब्बतियों ला गढ़वाल का वीरभड़ बड्थ्वाल भयों की हत्या कैरि दे। राजा यां भौत क्रोधित ह्वे। राजा ला तिब्बत परैं आक्रमण कनौ आदेश दे। तब गढ़वाल का वीर सपूत माधो सिंह भंडारी तिब्बत सेना लेकि पौंछि। काफी दिनों तक वेकु कुछ पता नि चलि ता सौब परेशांन हूण लैगेन। बाद म माधौ सिंह भंडारी जब सकुशल वापस श्रीनगर पौंछि तब लोगों न ख़ुशी म दीप जलैकि दीपावली मनै। साख्यों बिटिन इगास या बूढी दीपावली कु त्यौहार मनये जांद।

“बारा एनी बग्वाल माधो सिंगा,
सोलह ऐनी श्राद्ध माधो सिंगा।
सब्बि घौर ऐग्याय माधो सिंगा
मेरु माधो नि आई माधो सिंगा।
बारा बीती मैना माधो सिंगा
छै बीतीं ऋतू माधो सिंगा
मेरु माधो नि आई माधो सिंगा।
दाळ दळीं रैगे माधो सिंगा।
चौंळ छड़याँ रेगें माधौ सिंगा।
तु घौर नि आई माधो सिंगा
रण बिटी माधो सिंगा
मेरु माधो नि आई माधो सिंगा।
रण जीती आई माधो सिंगा
बीरों मा कु वीर माधो सिंगा
इगैस मनौला माधो सिंगा
बग्वाळ मनौला माधो सिंगा
बीरों मा कु वीर माधो सिंगा
बीरों मा कु वीर माधो सिंगा ।”

अर

सुख करी भैलो, धर्म को द्वारी, भैलो।
धर्म की खोली , भैलो जै-जस करी
सूना का संगाड़ भैलो, रूपा को द्वार दे भैलो।।
खरक दे गौड़ी-भैंस्यों की भैलो, गोठ दे बाखर्यों को, भैलो
हर्रों-तर्यों करी, भैलो।
भैलो रे भैलो, खेला रे भैलो।
बग्वाल की राति खेला भैलो।।
बग्वाल की राति लछमी को बास
जगमग भैलो की हर जगा सुवास
स्वाला पकोड़ों की हुई च रस्याळ
सबकु ऐन इनी रंगमती बग्वाळ
नाच रे नाचा खेला रे भैलो।
अगनी की पूजा, मन करा उजालो
भैलो रे भैलो।।

कुल मिलैकि उत्तराखंड म इगास का बार म भौत किंबदंती छन। कै गीत छन व विभिन्न रीति-रिवाज छन।
गढ़वाल हितैषिणी सभा का अध्यक्ष सूरत सिंह रावत ला सब्यों कु स्वागत कैरी। सभा महासचिव पवन कुमार मैठाणी ल कार्यक्रम कु संचालन कैरी।ये आयोजन म बरिष्ठ साहित्यकार रमेश चंद्र घिल्डियाल सरस, जबर सिंह कैंतुरा, जयपाल सिंह रावत, दर्शन सिंह रावत, बृजमोहन वेदवाल, उमेश चंद्र बंदूनी, दिनेश ध्यानी, उत्तराखण्ड लोक मंच क अध्यक्ष बृजमोहन उप्रेती, राजेंद्र चमोली, वीरेंद्र नेगी, रेनू उनियाल, संतोषी डोभाल, दिनेश डोभाल, नरेंद्र सिंह नेगी, उद्योगपति नरेंद्र सिंह लडवाल, एसीपी सतीश शर्मा, ओ.पी. जोशी, प्रियदर्शिनी मैठाणी, टी.सी.भंडारी, प्रेम सिंह नेगी, वीरेन्द्र सुयाल, सीनियर एडवोकेट संदीप शर्मा, मुरली सिंह नेगी, पत्रकार व्योमेश जुगराण, पत्रकार हरीश लखेड़ा, घंघतोल फिल्म के निर्माता संजय जोशी, श्रीमती सुशीला रावत व खुशहाल सिंह बिष्ट, लोक गायिका मनोरमा तिवारी भट्ट, गोविन्दराम भट्ट, गढ़वाल हितैषिणी सभा की पूरी कार्यकारणी, व समाज का कै गणमान्य लोग व दिल्ली विश्वविद्यालय छात्र बड़ी संख्या म उपस्थित छाया।