( संदीप गढ़वाली )
मि अनपढ़ आदिम छौं अंग्रेजी मा हथ जरा तंग च । मि अंग्रेजी का एक भी वर्ड नि जंणदु । दगड़ मा अंग्रेजी झड़ण वळों थैं देखि मि इम्प्रेस कम हुंदु अर अग्रेसिव जादा । अब हुंदु क्याच कि म्यार स्याळु होटल मैनेजमेंट कैरि कन आई । बल जिजा मिन एच एम कैरियाल ।
मिन ब्वाल वैरी गुड । अब अग्नै क्य बिचार च ?
बल म्यार विचार च भैर देश जाणां कु ।
मिन ब्वाल औ ठिक च ।बल आज क्या बणांण मि बणौलू । मिन ब्वाल मूळा की थिच्वणिं बणैं दे ।
वैन ब्वाल आप मिथै रेसिपि बतान्दारावा पर ह्या फास्ट फास्ट ह्वा ।
मिन ब्वाल पैली तै मूळा थैं साफ कैरि कन ध्वै । वैन ब्वाल स्यु म्यार काम नीच । तुम म्यारा हेल्पर छौ तुमुन करण मिन बस चुल्ला मा ध्वळण अर पल्टा चलाण ।
मिथैं इन लग जन कि म्यार खुटौ मुड़ि कैन आगि का फिंडक धैर दीं ।
फिर वो बार बार ब्वलण बैठि ग्याई कम फास्ट कम फास्ट अबि मूळा नि ध्वाई ? मेरि खुपड़ी खराब ।
मिन वैमा मूळा द्याई अर वो ब्वनू वाह जीजा आपन त कमाल कैरि दयाई इतगा फाइन चौप कैरि । मिन ब्वाल अबे वो फाइन चौप नीच ब्लकि थिच्यूंच । खांणू बगत ह्वैगे छाई अर वो म्यार दिमाग खांणू कि मिथै बि थिचण सिखावा ।
मिन ब्वाल यार पैली पैके ले भूख लगीं च त्वै थिचण हैंक दिन सिखौलू ।
पर वो जिद मा अड़ि ग्याई म्यार ड्यारम ऐकी मेखुणै ब्वनू कि जब त तुम मुझे थींचना नही सिखाओगे इस घर में खाना नही बनेगा । मेरि घरवळि बि ब्वन बैठ सिखै द्यावो तुम बित हैं जादै ऐटीट्यूड दिखांणा छौ ।
मन मारि कन मिन वैथै थिंचण सिखै । अब वैकी दीदी वैथैं डाक्टर मा ल्हे कन गईच । फून मा ब्वनी छै कांडा लगला तौं हत्यूं मा म्यार भुल्ला कु सर्या आंखु कळ्यूंच । पीठ फरि दामळ उपड़ी छन ।
मिन ब्वाल मेरि क्या गलती तिन त ब्वाल कि वैथैं थिचण सिखावा लाइव डेमो द्यावा । अब त्वै पता च अंग्रेजी मिथै आंदि नीच । अर वो बि त हरिबि थिचेणू राई अर होरि होरि लग्यू राई।
बल हे निरभै मनिखा वो सौरि सौरि ब्वनू राई ।
पैल बार मिथै अहसास ह्वै कि मी से गल्ती मा मिस्टेक ह्वै ग्याई।
About the Author
