रंत रैबार ब्यूरो
नई दिल्ली। शिक्षक दिवस को मौक मा 5 सितंबर 2026 कू देश की महामहिम राष्ट्रपति श्रीमती द्रौपदी मुर्मू न दिल्ली क विज्ञान भवन मा देशभर क 82 शिक्षकौं तैं राष्ट्रीय शिक्षक पुरस्कार से सम्मानित करी। सम्मानित शिक्षकौं मा उत्तराखंड क राजकीय पूर्व माध्यमिक विद्यालय, मुस्याखांद, विकासखंड नैनीडांडा, पौड़ी गढ़वाल का प्रधानाध्यापक गबर सिंह बिष्ट भी शामिल छ्या। यु उत्तराखंड का एकमात्र शिक्षक छन, जै तैं राष्ट्रीय शिक्षक पुरस्कार जन प्रतिष्ठित सम्मान मिलि।
राष्ट्रीय शिक्षक पुरस्कार सि सम्मानित गबर सिंह बिष्ट कु दिल्ली-एनसीआर की प्रमुख सामाजिक संस्था गढ़वाल हितैषिणी सभा (रजि.) न दिल्ली का गढ़वाल भवन मा भव्य सम्मान अर अभिनंदन करि।
ये मौके मा सभा का महासचिव पवन कुमार मैठाणी न बोलि कि यु खाली एक शिक्षक कु सम्मान कन्न कु मौक नि, बल्कि उत्तराखंड की माटी सि निकळ्या एक कर्मठ अर समर्पित शिक्षक की राष्ट्रीय उपलब्धि मा पूरा प्रवासी उत्तराखंडी समाज का गर्व अर सम्मान व्यक्त कन्न कु मौक छ।
वृतै गबर सिंह बिष्ट कु गढ़वाल भवन मा सम्मान कन्न मा गढ़वाल हितैषिणी सभा खुद भी गौरवान्वित महसूस कन्नी छ। राष्ट्रीय स्तर मा सम्मानित शिक्षकों की सूची मा श्री बिष्ट न नाम शामिल होण पूरा उत्तराखंड समाज खातिर बड़े गर्व की बात छ।
श्री गबर सिंह बिष्ट न अपन काम सि यो साबित करि द्याय कि पद कभै छोटो-बड़ो नि हुंद। असल बड़प्पण तैं उस पद मा रैकि समाज अर आगळी पीढ़ी खातिर कन्न वला काम सि मिल्द । वृंकु शिक्षा प्रति समर्पण, कर्तव्यनिष्ठा अर मेहनत आज का शिक्षकौं खातिर प्रेरणा कु स्रोत छ।
ये मौका मा सभा का महासचिव पवन कुमार मैठाणी, सांस्कृतिक सचिव वीरेंद्र सिंह नेगी, वरिष्ठ कार्यकारिणी सदस्य जंगत सिंह असवाल, वॉइस ऑफ माउंटेन का पत्रकार जगमोहन सिंह रावत, संध्या रावत, जसवंत सिंह रावत, गढ़वाल भवन का प्रबंधक धीरेन्द्र सिंह गुसाईं अर राष्ट्रीय शिक्षक पुरस्कार सूं सम्मानित शिक्षक गबर सिंह बिष्ट ज्यूं की धर्मपत्नी श्रीमती सुमित्रा देवी खास तौर मा मौजूद रैनि।
सभा ले श्री गबर सिंह बिष्ट ज्यूं कु इ गौरवपूर्ण उपलब्धि खातिर हार्दिक बधाई अर दिया साथ उनक उज्ज्वल भविष्य की कामना करी।
About the Author
