(रंत रैबार ब्यूरो दिल्ली)
नईदिल्ली। 20 नवम्बर, 2025 खुणि गढ़भारती द्वारा वरिष्ठ साहित्यकार रमेश चंद्र घिल्डियाल सरस जी कु जन्मदिन भाषा संकल्प दिवस का रूप म मनाये गे। गढ़वाल भवन नई दिल्ली म आयोजित ये समारोह म कै साहित्यकार, पत्रकार, रंगकर्मी व समाज का अग्रणी लोगों ल भाग ले। ज्ञातव्य हो कि वरिष्ठ साहित्यकार रमेश चंद्र घिल्डियाल सरस को जन्म ग्राम सरासु पौड़ी गढ़वाल म आज से 73 साल पैली ह्वे छौ। वोंकी उच्च शिक्षा दिल्ली विश्वविद्यालय बिटिन ह्वे। भारत सरकार म चालीस साल सेवा कना बाद घिल्डियाल जी राजपत्रित अधिकारी का रूप म सेवानिवृत ह्वे कि दिल्ली म रैणा छन। वोन अपरु पहाड़, अपरु गौं बिटिन बि सम्बध बनैक राखी। आज घिल्डियाल जी का गौं म एक पुस्तकालय स्थापित कर्यों च। साहित्य सृजन म आपन कै पोथी लिखीं अर लगातार लेखन जारी च। हिंदी व गढ़वाळि म आपकी कविता संग्रह, कहानी संग्रह, उपन्यास आदि कुल मिलैकि एक दर्जन से अधिक पोथी प्रकाशित छन। आप गढ़वाल अध्ययन प्रतिष्ठान का अध्यक्ष बि छवा। प्रतिष्ठान द्वारा बिगत तीस म लगभग 20 पुस्तकों कु प्रकाशन कर्यों च। अरअबोध बंधु बहुगुणा साहित्य सम्मान, ललित मोहन थपल्याल नाट्य कला सम्मान अर मीरा गैरोला स्मृति संगीत कला सम्मान बि लगातार प्रदान करणा छन। हर साल उत्तराखण्ड साहित्योत्सव कु आयोजन बि प्रतिष्ठान लगातार करणु च। उत्तराखण्ड लोक-भाषा साहित्य मंच, दिल्ली का आप बरिष्ठ सलाहकार छौ। वर्तमान म आपन चालीस साल पैली स्थापित गढ़भारती संस्था तैं दुबारा शुरू कर्यों। कुल मिलैकि श्री घिल्डियाल जी लगातार भाषा-साहित्य का क्षेत्र म लगातार काम करणा छन।
ये मौका परैं रमेश चन्द्र घिल्डियाल सरस जी न बोलि कि हमरि कोशिश च कि हम लगातार साहित्य सेवा व कुछ न कुछ सकारात्मक सोच का दगड़ी अगनै बढ़ों। आज नई पीढ़ी तैं बि अपरा भाषाई सरोकारों का दगड़ी जोड़ी चलण बगता कि जरुरत च। तभी हमरा भाषाई सरोकार अग्रेषित होला। आज ये मौका परैं आप सब लोगों द्वारा जु जीवंत माहौल बणैकि मेरु जन्मदिन तैं यादगार बणै ह्रदय से आप सब लोगों कु आभार।
गढ़वाल भवन म आयोजित ये समारोह म कवियों ला अपरी कवितापाठ कैरि। कुछ लोगों ला अपरा संस्मरण सुणै। जौं म बरिष्ठ साहित्यकार रमेश चंद्र घिल्डियाल सरस, जयपाल सिंह रावत, खुशहाल सिंह बिष्ट, बृजमोहन वेदवाल, डॉ सतीश कालेवश्वरी, दर्शन सिंह रावत, चारु तिवारी, दिनेश ध्यानी, मनोज चंदोला, उमेश बंदूनी, निर्मला नेगी, डॉ कुसुम भट्ट, कुसुम चौहान, रिया शर्मा, राकेश गुसाईं आदि लोगों ला अपरी बात राखी। सब लोगों ल बोलि कि बरिष्ठ साहित्यकार घिल्डियाल जी जतगा सरल छन वोंकी विद्वता व सामाजिक सरोकारों दगड़ी आपकु सहयोग उत्गा अहम् च। उत्तराखण्ड लोक-भाषा साहित्य मंच, दिल्ली का संयोजक दिनेश ध्यानी ल बोलि कि ये मौका परैं हम तैं गढ़वाळि , कुमाउनी भाषाओं तैं संविधान की आठवीं अनुसूची म शामिल कना खातिर संकल्प लेण चैंद। दुसरा उत्तराखण्ड म गढ़वाळि , कुमाउनी भाषा अकादमी का गठन का खातिर लगातार जतन करण चैन्द। सब्बि लोगों ला श्री ध्यानी की बात कु समर्थन कैरी। समारोह म उपस्थित लोगों ला अंगवस्त्र,शाल अर पुष्पगुच्छ से सम्मानित करि। समाजसेवी व सिने अभिनेत्री रिया शर्मा द्वारा ये मौका परैं केक व पुष्पगुच्छ द्वारा घिल्डियाल जी का जन्मदिन तैं हौरि यादगार बणै दे। बाद म जलपान का दगड़ी ये आयोजन तैं समायोजित करेगे। समारोह म दिल्ली एन सी आर का जण्यां मन्यां साहित्यकार, कलाकार, रंगकर्मी, पत्रकार अर समाज का अग्रणी लोगु ल सहभागिता करि । सबकु सहयोग उतगै महत्वपूर्ण च ।
कार्यक्रम कु सञ्चालन बरिष्ठ कवि, रंगकर्मी बृजमोहन वेदवाल द्वारा करेगे।
About the Author
