रंत रैबार व्यूरो दिल्ली…..
नई दिल्ली। उत्तराखण्ड लोक-भाषा साहित्य मंच, दिल्ली द्वारा आगामी 11 नवम्बर, 2025 खुणि महाकवि कन्हैयालाल डंडरियाल जी की 92वीं जयंती परैं गढ़वाल भवन नई दिल्ली म डंडरियाल जी का साहित्य संसार परैं चर्चा होली दगड़ी युवा कवि श्री आशीष सुंदरियाल द्वारा प्रकाशित डंडरियाल जी का नाटक संग्रह कु लोकार्पण बि होलु। ज्ञातव्य हो कि महाकवि कन्हैयालाल डंडरियाल जी कु अप्रकाशित साहित्य तैं आशीष सुंदरियाल प्रकाशित करणा छन। आशीष सुंदरियाल का प्रयास से यां से पैली डंडरियाल जी को उपन्यास रुद्री, खडकाव्य बाग़ी उप्पनै लड़ै प्रकाशित ह्वेगे। अज्यों बि डंडरियाल जी कु शब्दकोश समेत कै पोथी अप्रकाशित छन। डंडरियाल जी का शब्दकोश प्रकाशित कना खातिर बि श्री आशीष सुंदरियाल लगातार जतन करणा छन।
उत्तराखण्ड लोक-भाषा साहित्य मंच, दिल्ली का संयोजक श्री दिनेश ध्यानी ल बताई कि 5 अक्टूबर, 2025 खुणि गढ़वाल भवन नई दिल्ली म आयोजित मंच की बैठक म तय ह्वेकि 11 नवंबर, 2025 मंगलवार का दिन डंडरियाल जी की जीवनी व ओंका साहित्य परैं चर्चा होली। मंच द्वारा डंडरियाल जी का नौ से साहित्य सम्मान दिए जांद यु सम्मान आगामी दिसम्बर, 2025 खुणि एक बडु आयोजन म प्रदान करे जालु। गढ़वाल भवन यीं बैठक म बरिष्ठ साहित्यकार श्री रमेश चंद्र घिल्डियाल सरस, बरिष्ठ रंगकर्मी व कत्थक नृत्य का बरिष्ठ कलाकार श्री जगदीश ढौंडियाल, बरिष्ठ साहित्यकार श्री दीनदयाल बंदूनी, श्री चन्दन प्रेमी, श्री जयपाल सिंह रावत , श्री दर्शन सिंह रावत, श्री अनिल कुमार पंत, श्री दिनेश ध्यानी, श्री गिरधारी रावत, श्रीमती निर्मला नेगी, श्री प्रदीप रावत खुदेड़ आदि उपस्थित छाया।
About the Author
