(भीष्म कुकरेती)
लगभग सन सहत्तर तक ढांगू म भाना बडा अर स्य मुड़ बडा द्वी भाई छा (स्वर्गीय भानाराम जी व स्यमुड़ राम जी ) अर दुयुंकी क लोहारगिरि म प्रशंशा हूंदी छे। द्वी भैयुं की लोहारगिरि म श्रेष्ठ लोहारों म गणत हूंदी छे।
मेरी ददि स्वर्गीय क्वाँरा देवी (पत्नी स्वर्गीय शीशराम कुकरेती जी अर म्यार पिताजी की बोडी ) व बडा जी स्वर्गीय मुरलीधर कुकरेती बुल्दा छा कि भाना बडा जी अर स्यमुड़ बडा जी को परिवार जसपुर म कुकरेतियों दगड़ इ बस छा अर साक्षी बि च कि भाना बडा जी अर स्यमुड़ बडा कूड़ शिल्पकारों से सबसे अळग म च। भाना बडा जी अर स्यमुड़ बडा सब कुकरेती अर बहुगुणाओं क पारिवारिक पुस्तैनी लोहार छा। हमर कुटुंब क लोहार भाना बडा छा।
उन तो क्षेत्र म प्रत्येक गाँव म अपर अपर लोहार छा किन्तु सबों तैं भारी लोहार गिरी हेतु भाना बडा जी अर स्यमुड़ बडा जी म आण पोड़द छौ जन बड़ी थमाळी , बेलचा , सब्बल , दांद निर्माण हेतु क्षेत्र वासियों तै भाना बडा जी अर स्यमुड़ बडा जी की सेवा लीण पड़द छौ।
द्वी भायुंन जसपुर की ही सेवा नि कार अपितु जसपुर को निर्यात म बि भागीदारी निभायी। दुयुं क प्रशंसा निपुण लोहार रूप म हूंदी छे।
द्वी भाइयों सुभाव शांत अर संतोषी प्रकारो छौ।
भाना बडा जी क द्वी नौन भगतराम जी व ब्रजमोहन जी छा। अर स्यमुड़ बडा का सुदामाराम जी व भरोषा राम जी द्वी लड़िक छा। भक्ता दा अर भरोसी दा द्वी सेना म छा।
भाना बडा जी अर स्यमुड़ बडा जी सदा ही जसपुर से लोहारगिरि सेवा निर्यात हेतु याद करे जाल
About the Author
